Joh 2 | YomNWM | STEP | Mu lumbu kintatu, nyengo wu makuela wuba ku Kana mu tsi Ngalili. Ngudi Yesu yiba kuna.

John 2

Kumu kitheti

1 Mu lumbu kintatu, nyengo wu makuela wuba ku Kana mu tsi Ngalili. Ngudi Yesu yiba kuna.

2 Yesu ayi minlonguki miandi mamvawu batumusu ku nyengo beni wu makuela.

3 Vayi zimbukila vinu kimeni. Buna ngudi Yesu yiyiza kunkamba :

—Basiedi diaka ayi vinu ko.

4 Yesu wumvutudila :

—A nketo, mambu mbi tuidi beto yaku e ? Thanguꞌama yifueni ko.

5 Buna ngudi andi wukamba bisadi ti :

—Luvanga mambu moso ka kuiza lukambi.

6 Mimvungu minsambanu miba vana mu diambu di lundilanga nlangu, mitulu vana boso bubela kifu ki Bayuda mu kukivedisanga ^{▼▼Kukivedisanga : Bayuda baba kifu ki kukivedisanga tuamina badia, bu balembu dia ayi bu bamanisini dia. Nlangu wu kukivedisila wuba lundulungu mu mimvungu.}. Mvungu wumosi wulenda kota nduka-nduka khatitsika yi dingungulu di nlangu. 7 Buna Yesu wukamba bisadi :

—Wesanu nlangu mu mimvungu.

Buna bawesa mimvungu beni nate vana ntu.

8 Yesu wubuela kuba kamba diaka :

—Buabu bonganu fioti ayi lunata fiawu kuidi nkulutu wu nyengo.

Bawu bannatina kiawu.

9 Nkulutu wu nyengo bu babimba nlangu wukituka vinu, kasia zaba ko kuevi kuba vinu beni Vayi bisadi biteka nlangu bizaba. Buna nkulutu wu nyengo wutumisa mu nsualu dibakala diodi dikuela 10 ayi wunkamba :

—Woso kuandi mutu weta tuama kabudila batu vinu kimboti ; bosi ku nzimunina wunkabulanga vinu kidekuka, batu bu bameni nua bufuana. Vayi ngeyo kimboti kiawu lundidingi nate thangu yayi.

11 Kiaki kiawu kumu kitheti mu bikumu bivanga Yesu ; kiawu kivangimina ku Kana mu tsi yi Ngalili. Kuna kamonisa nkemboꞌandi ayi minlonguki miandi minwilukila.

12 Momo bu mavioka, Yesu wuyenda ku Kafalinawumi va kimosi ayi ngudi andi, ayi bakhomba bandi ayi minlonguki miandi. Ndambu bilumbu kaka bavuandila kuna.

Yesu mu nzo Nzambi

(Matayi 21.12-17 ; Malako 11.15-17 ; Luka 19.45-46)

13 Pasika buna yeka nduka, Yesu wuyenda ku Yelusalemi. 14 Wumona muna luphangu lu nzo Nzambi minsumbisi mi zingombi, mi mamemi ayi mi mabembi ayi minsienzi mi zimbongo buna mimvuendi. 15 Buna wubonga minsinga, wuvanga kikoti. Buna wukuka batu boso ku luphangu lu Nzo Nzambi ayi mamemi ayi zingombi, wuloza zimbongo zi minsienzi va tsi ayi wusengubula zimeza. 16 Bosi, wubaluka kuidi minsumbisi mi mabembi, wuba kamba :

—Botulanu bima biobi vava ! Lubika kitula nzo yi dise diama dizandu !

17 Minlonguki miandi mitebuka moyo ti busonama :

A Nzambi, luzolo luidi yama mu diambu di nzoꞌaku
luawu luela kuphondisa.
18 Bayuda bamvutudila :

—A kumu mbi wulenda vanga mu kutumonisa ti bukiedika lulendo luidiyaku luvangila mambu moso momo e ?

19 Yesu wuba kamba :

—Tiolumunanu Nzo Nzambi yayi, ndiela kuyitungila mu bilumbu bitatu.

20 Buna Bayuda batuba :

—Mu makumaya ayi mimvu minsambanu nzo Nzambi yayi yitungulu vayi ngeyo mu bilumbu bitatu kuandi fueti buela kuyitungila ?

21 Vayi niandi wuyolukila nzo Nzambi yi nitu andi.

22 Yesu bu kafuluka mu bafua, minlonguki miandi mitebuka moyo ti wutuba buawu. Buna miwilukila masonuku ayi mambu momo matuba Yesu.

23 Mu thangu Yesu kaba ku Yelusalemi mu nyengo wu Pasika, batu bawombo bamona bikumu biobi kavanga ayi bawilukila mu dizina diandi. 24 Vayi yesu kasi kubasila diana ko bila wuzaba batu boso. 25 Bila kasia ba mfunu ko muingi mutu wunkaka katelama kimbangi mu diambu di mutu wunkaka bila niandi veka wuzaba mambu madi mu mutu.